இனங்களின் கோடுகளை அழித்து அதிகாரத்தை எதிர்த்து வாழ்தல்

Nov 22nd, 2010 | எழுத்தாளர்: | பகுப்பு: இதழ் 33, கட்டுரைகள்

ஒவ்வொருவருடைய வாழ்வும் அவரவர்கள் வாழ்கின்ற காலத்தையும், இருக்கின்ற சமூகங்களையும் பொறுத்து வேறுபடக் கூடியது. அனைத்து நிலப் பரப்புகளுக்கும் நம்மால் எப்படி பயணிக்க முடியாதோ, அவ்வாறே நம்மால் எல்லோருடைய வாழ்வையும் வாழ்ந்து பார்க்கவும் முடியாது. ஆனால் எம்மால் வெவ்வேறு வாழ்க்கை முறைகளையும், கலாசார பண்பாட்டுப் பின்புலங்களையும் வேறு வகைகளால் விளங்கிக் கொள்ள முயல முடியும். அதற்கு நம் எல்லோருக்கும் விசாலமாய் சிந்திக்கும் மனோநிலையும், தெரியாததைத் தெரிந்து கொள்ளும் ஆர்வமும், இவற்றுக்கு அப்பால் முன் முடிவுகள் எதையும் எடுக்காத சகிப்புத்தன்மையும் அவசியமாகின்றன.

Aimee & Jaguar என்கின்ற இத்திரைப்படம் இரண்டாம் உலகப்பேரின்பேது நடக்கின்ற கதை. ஹிட்லரின் நாஸிப் படைகள், அமெரிக்காவினதும் அதன் நேசப் படைகளினதும் தாக்குதல்களினால் தோல்வியுற்றுக் கொண்டிருக்கின்ற காலகட்டம்; விமானக்குண்டுகள் அகோரமாக ஜேர்மனிய நகரங்களில் விழுந்து வெடிக்கின்றன. வெல்வதற்கான சந்தர்ப்பம் இன்னமும் உள்ளதென அதீத நம்பிக்கை கொள்கின்ற நாஸிப்படையினர் எல்லைகளில் நின்று சண்டை பிடித்துக் கொண்டிருக்கின்றனர்.

நான்கு குழந்தைகளின் தாயான லிலிக்கு (Lilly) நாஸிப்படையில் போரிட்டுக் கொண்டிருக்கின்ற கணவனால், அவரின் உடல் சார்ந்த வேட்கையைத் தணிக்க முடியாதிருக்கின்றது. அந்தவேளையில் தலை மறைவாக வாழ்ந்து வருகின்ற யூதப்பெண்ணான பெலிசியிடன் (Felice), லிலிக்கு உறவு முகிழ்கின்றது. தொடக்கத்தில் காதலும் காமமும் வழிய வழிய வருகின்ற அநாமதேயக் கடிதங்கள் ஒரு ஆணால் அனுப்பப்படுகின்றதென லிலி நினைக்கின்றார். பின்னாளில் அது பெலிசியினால் எழுதப்பட்ட கடிதங்களெனக் கண்டுபிடித்து பெலிசியோடு சேர்ந்து வாழத் தொடங்குகின்றார். இவ்வாறிருக்கையில் தலை மறைவாக இருக்கும் பெலிசியின் நண்பரொவர் நாஸி உளவுத்துறையால் சுடப்பட்டு கொல்லப்படுகின்றார். அதிலிருந்து தொடரும் விசாரணைகளில் யூதரான பெலிசியையும் நாஸிகள் தேடத்தொடங்குகின்றனர்.

இதற்கிடையில் குறுகிய விடுமுறையில் போர்முனையிலிருந்து திரும்பி வரும் லிலியின் கணவன், லிலிபெலிசியின் உறவைக் கண்டுபிடிக்கின்றார். எனினும் நான்கு குழந்தைகளுடன் இருக்கும் லிலி தன்னுடன் திரும்பிவருவார் என்று கணவன் நம்புகின்றபோது, லிலி தனக்கு விவாகரத்துத் தரும்படி கணவனிடம் வேண்டுகின்றார்.

விவாகரத்துப் பெற்ற லிலியுடன் பெலிசி சேர்ந்து குடும்பப் பொறுப்புக்களை எடுக்கும்போது, ஹிட்லரைக் கொல்வதற்கென உட்கட்டமைப்புக்குள் நிகழ்ந்த Valkyrie திட்டம் நிகழ்ந்து தோல்வியில் முடிகின்றது (இந்தக் கொலைத் திட்டத்தை வைத்து, அண்மையில் Tom Cruise நடித்து சொதப்பிய படம் நினைவுக்கு வருகிறது) அதன்பின் நிகழ்கின்ற படுமோசமான களையெடுப்பில், தாங்களும் அகப்படப் போகின்றோம் என்று அஞ்சி, தலைமறைவாய் வாழும் பெலிசியின் நண்பர்கள் ஜேர்மனியை விட்டு வெளியேறுகின்றனர். தங்களுடன் கூடவே வர வற்புறுத்தியும் பெலிசி, தன் காதலியான லிலியை விட்டு வரமாட்டேனென மறுக்கின்றார்.

இந்தப் பொழுதிலேயே லிலியிடம், பெலிசி தான் தலைமறைவாய் வாழுமொரு யூத இனத்தைச் சேர்ந்தவர் என்ற உண்மையைக் கூறுகின்றார். யூதர்களைத் தேடி அழிக்கும் நாஸிகளின் பதற்றமான காலகட்டத்தில் பெலிசியை லிலி ஏற்றுக்கொள்வதோடு, தனது காதலியைத் தனது பெற்றோர்களிடமும் அறிமுகப்படுத்துகின்றார். ஓரினப்பால் துணையாக மட்டுமின்றி, ஒரு யூதராகவும் இருக்கும் பெலிசியை, லிலியின் பெற்றோர் தயக்கத்துடன் ஏற்றுக்கொள்கின்றனர்.

இறுதியில், பெலிசியின் கொல்லப்பட்ட தோழியிடம் கண்டெடுத்த தடயங்களை வைத்து, பெலிசியை லிலியின் வீட்டில் வைத்து நாஸிகள் கைது செய்கின்றனர். சிறையிலிருக்கும் பெலிசியை அவ்வப்பேது லிலி சந்தித்தாலும் அவரால் பெலிசியை விடுதலை செய்ய முடியாதிருக்கின்றது. பின்னர் போலந்திலிருந்த ஒரு சித்திரவதை முகாமில் எவ்விதச் சாட்சியங்களுமின்றி பெலிசி காணாமற் போய்விடுகின்றார் (கொல்லப்பட்டு விடுகின்றார்).

பின்னாளில் முதிய வயதில் லிலி தனது பால்யகாலத் தோழியொருவரை முதியோர் இல்லமொன்றில் சந்திக்கும்பேதே இந்தக் கடந்தகால நினைவுகள் கிளறப்படுகின்றன. லிலியின் தோழி, பெலிசி கைதுசெய்யப்பட்டு காணாமற்பேனதன் பிறகு, எவ்வாறு லிலியின் வாழ்வு கழிந்ததென வினாவுகிறார். பெலிசி கைதுசெய்யப்பட்டதன் பிறகு தான் எந்தப் புதிய உறவுக்குள்ளும் போகவில்லை என்கின்ற லிலி, பெலிசியோடு இருந்த காலங்களே உண்மையான காதலோடு இருந்த காலங்களெனக் கூறி நனவிடை தோய்வதோடு படம் முடிவடைகிறது.

இப்படம், போரின் பதற்றங்களை மட்டு மில்லாது போர்க்கால அழிவுகளையும் காட்சிப்படுத்துகின்றது. ஒரு காலத்தில் தேசியத்தின் பேரால் வெறியூட்டப்பட்ட மக்கள், அழிவுகள் தம் வீட்டு வாசல்களில் வந்து கொண்டிருப்பதைத் துயரத்துடன் பார்த்தபடி இருப்பது மனதில் தைக்கும் படியாக காட்டப்பட்டிருக்கின்றது. ஒரு காட்சியில் குழந்தைகளை மிருகக்காட்சிச் சாலைக்குக் கூட்டிச் செல்லப்படும் பேது அங்கே மிருகக்காட்சிசாலை யென்றிருப்பது குண்டுத் தாக்குதலில் சிதிலமாகிப் போன ஒரு கட்டடத் தொகுதி மட்டுமே. குண்டுகள் தொடர்ச்சியாக வீழ்ந்துகொண்டிருக்க, மனிதர்கள் உடல்களைச் சர்வசாதாரணமாக வேற்றுக்கிரகவாசிகள் மாதிரி தாண்டியபடி நட மாடிக்கொண்டிருக்கின்றார்கள். ஆனால் இவ்வாறாக தோல்வியின் விளிம்பில் நாஸிகள் நின்றபோதும் தமது அதிகாரத்தைக் கைவிடாது அரச இயந்திரம் யூதர்களை வேட்டையாடியபடியே இருக்கின்றது என்பதும் காட்டப்படுகின்றது. அதே போன்று எல்லாமே கைநழுவிப்பேய் விட்டாலும், ஹிட்லரின் தேசியத்தின் மீது கடைசிவரை நம்பிக்கையிழக்காது போர் முனைக்குப் போய் இறக்கின்ற லிலியின் கணவனைப் போன்றவர்களும் இருக்கத்தான் செய்கின்றார்கள்.

தமக்கான மகிழ்ச்சியை மட்டுமில்லாது தமக்கான பாலியல் விடுதலையைத் தேடுகின்றவர்களாய் லிலியும் பெலிசியும் இருக்கின்றார்கள். தனது மரணம் வாசலடியில் ஒரு நிழலைப்போல மறைந்திருக்கிறது என்பதைத் தெளிவாக உணர்கின்ற பெலிசி அந்த நாளைய மகிழ்வையோயா அல்லது தனது காதலையோ கைவிடத் தயாரில்லாதவராகவே இருக்கின்றார். வாழ்வு என்பது என்ன என்கின்ற கேள்வி தோழிகளிடையே வரும்பேது ‘நான் இந்தப் பொழுதைக் கொண்டாடிக்கொண்டிருப்பவள் நாளையப் பற்றி ஒருபேதும் கவலைப்பட்டதில்லை’ யென பெலிசி தன்னைப் பிரகடனம் செய்து கொள்ளவும் செய்கின்றார். இரண்டாம் உலகயுத்தத்தின் போது ஜேர்மனியில் கூட தலைமறைவாக மிகப்பெரும் எண்ணிக்கையான ஓரினப்பால் பெண்கள் இருந்ததை இப்படம் கவனப்படுத்துகின்றது.

ஹிட்லரின் நாஸிப்படைகள் யூதர்களை மட்டுமின்றி ஹிப்பிகள், ஓரினப்பாலார் போன்ற பல்வேறு விளிம்பு நிலை மனிதர்களைப் பரிசுத்த இனப்பெருமையில் கணக்கில்லாது கொன்றொழித்ததை நாம் நினைவில் கொள்ளவும் வேண்டும். அதிகாரம் மறுத்த வாழ்க்கை முறைக்கு எதிராக தங்கள் வாழ்வு முறையையே ஒரு போராட்டமாக ஆக்கிக்கொண்ட லிலியைப் போன்ற எத்தனையோ பேர்கள் காலங்காலமாக இருந்துகொண்டேதான் இருக்கின்றார்கள். .

தமிழ்ச் சூழல் சார்ந்து ஓரினப்பால் குறித்து மிகக் குறைவான உரையாடல்களே நிகழ்த்தப்பட்டிருக்கின்றன. ஓரினப்பால் குறித்து தமிழில் படங்கள் ஏதாவது வந்தி ருக்கின்றதா எனப் பார்க்கும்போது, சுமதி ரூபன் திரைக்கதை எழுதி, ரூபன் இயக்கிய You 2 என்ற (30-45 நிமிடங்கள்) ஓடக்கூடிய ஒரு குறும்படமே வந்திருக்கின்றதெனத் தோன்றுகின்றது. அந்தப் படத்தில் நடிப்பதற்கும் நடிகைகள் தேட தான் மிகவும் கடினப்பட்டதாய் சுமதி எங்கோ ஓரிடத்தில் கூறியதும் நினைவினிலுண்டு. நடிகைகள் இல்லாது போனபோது திரைக்கதை எழுதிய சுமதியே அதிலொரு பாத்திரம் ஏற்கவேண்டியும் இருந்திருக்கின்றது. You 2 என்கின்ற இக்குறும்படத்தின் கதை, குழந்தைகளுள்ள ஒரு பெண் தனது கணவனின் வன்முறையால் பாதிக்கப்பட்டு இன்னொரு தோழியின் வீட்டில் சென்று வாழத் தொடங்குகின்றார். கணவனை கண்கண்ட தெய்வம் என நம்புகின்ற குடும்ப வன்முறையால் மிக மோசமாகப் பாதிக்கப்பட்ட பெண் கணவனிடம் மீண்டும் போக விரும்புகின்றவராய் தொடக்கத்தில் இருக்கின்றார்.

இவ்வாறான நீட்சியில் இரு தோழிகளுக்குமிடையில் ஒரினப்பால் உறவு முகிழ்கின்றது. ஆனால் அந்த ஓரினப்பால் உறவில் கூட ஏற்றத்தாழ்வுகள் இணைகளுக்குக்கிடையில் வருவதையே ‘நீயும் கூடவா’ என்று அந்த வன்முறையால் பாதிக்கப்பட்ட பெண் நினைப்பதாய் படம் முடிக்கப்பட்டிருக்கும். அற்புதமான ஒளிப்பதிவாலும், ஆக அலட்டலில்லாது சூட்சுமமாய் தோழி களிடையே வரும் உறவைக் காட்டிய இந்தப் படம் குறித்து இதுவரை ஆக்கப் பூர்வமான உரையாடல்கள் நிகழவேயில்லை என்பது நம் காலத்தைய சோகம். ஓரினப்பால் பற்றிய சரியான புரிந்துணர்வுகளே இல்லா நம் சமூகத்தில், லெஸ்பியன் உறவுகளிலும் அதிகாரம் நுண்ணியதளத்தில் செயற்படுகின்றது என்பதை இப்போது காட்சிப்படுத்துவது அவசியமா என்று இப்படத்தை முன்வைத்து சில கேள்விகள் இருப்பினும், எதையும் எந்தக் காலத்திலும் எடுக்கும் சுதந்திரம் ஒரு படைப்பாளிக்கு இருக்கிறதென்பதையும் மறுக்கமுடியாது.

Amiee & Jaguar படம், நுட்பமான பல கேள்விகளைப் பார்வையாளரிடையே முன் வைக்கின்றது. குடும்பம் என்ற அமைப்பைத் தீவிரமாக நம்பும் ஒருவருக்கு நான்கு பிள்ளைகளுடன் உள்ள லிலியின் பாத்திரம் உவப்பாக இருக்கப் போவதில்லை. லிலியிடம் ஒரு சமயத்தில் இரண்டு தெரிவுகள் இருந்திருக்கின்றன. சமூகத்தின் சட்ட திட்டங்களுக்கு உட்பட்டு தனக்கு உவப்பில்லாத வாழ்வை வாழ்வது ஒன்று. தனக்குப் பிடித்ததொரு வாழ்வை சமூகம் வரையறுத்த சட்டகங்களை உடைத்து வாழ்வது என்பது மற்றொன்று. இங்கே லிலி தனக்குப் பிடித்தமான ஒரு தெரிவை எடுக்கின்றார். ஆனால் அவ்வாறு தீர்க்கமான முடிவுகள் எடுக்கமுடியாது ஆயிரங்காலப் பண்பாட்டுச் சுமை சுமக்கவேண்டிய அவலம் பல பெண்களுக்கு இருக்கிறது. தனக்கு நெருக்கமாகவும், தனது உடல் சார்ந்த மர்மங்களின் முடிச்சுகளை அவிழ்க்க கூடியவராகவும் இன்னொரு பெண்ணே இருக்கமுடியுமென லிலி கண்டுபிடிக்கின்றார். தான் நம்பிய காதலுக்காய் லிலி கடைசிவரை உண்மையாகவே இருக்கின்றார். தனது துணை, தங்களுக்கு எதிரிகளாகக் கட்டி யமைக்கப்பட்ட யூத இனத்தவரைச் சேர்ந்தவர் என்று பின்னாட்களில் அறிகின்றபோதும், அந்தத் தடைகளை மீறி பெலிசியை முழுமனதுடன் தனது துணையாக ஏற்றுக்கொள்ள லிலி தயங்கவும் இல்லை.

இந்தக் கதை, ஹிட்லரின் காலத்தில் நிகழ்ந்த ஒரு உண்மைக்கதையாகும். கிட்டத்தட்ட ஐம்பது ஆண்டுகளுக்கு பின் இந்தக் கதையை எரிக்கா பிஷர் என்பவர் நூலாக எழுத, பின்னர் இப்படமாக எடுக்கப்பட்டிருக்கின்றது. உண்மைகள் எப்போதும் அடியாழங்களில் உறங்கிக் கொண்டிருக்காது; அவ்வாறு உண்மைகள் ஒருநாள் வெளியே வரும்போது அதிகாரத்திலிருந்து தமக்கான வரலாற்றை எழுதியவர்களை மீண்டும் புதைகுழிகளிலிருந்து வெளியே எடுத்து, அவர்களின் பீடங்கள் தகர்க்கப்படுவதும் நிகழ்ந்துகொண்டுதானிருக்கிறது.

Tags: , ,

Comments are closed.